Sannprófun – reglubundið mat á kolefnisbindingu

Sannprófun felur í sér reglubundið mat á verkefni samkvæmt kröfum Skógarkolefnis af hálfu vottunarstofu, aðila sem hlotið hefur þar til bæra faggildingu. Við sannprófun er lagt mat á þá kolefnisbindingu sem raunverulega hefur átt sér stað, sem og áframhaldandi umhirðu skógarins samkvæmt íslenska staðlinum ÍST 95:2025 – Leiðbeiningar um sjálfbæra skógrækt. Við sannprófun gengur vottunarstofan úr skugga um að yfirlýsingar um áætlaða eða raunverulega kolefnisbindingu séu efnislega réttar:

• Á 5. ári, með takmörkuðum áreiðanleika
• Frá og með 10. ári með fullnægjandi vissu

Hvenær skal sannprófa og hversu langan tíma getur það tekið?

Fylgja skal forskrift úttektar sem tilgreind er í leiðbeiningum um úttektaraðferðir fyrir Skógarkolefnisverkefni (sjá Úttektaraðferðir 2.2.1.pdf). Einnig eru ítarlegar leiðbeiningar í kafla 2.5 Vöktun, sem verkefni þurfa að fylgja. Fyrstu sannprófun skal lokið 5 árum eftir stofndag verkefnis og síðan á a.m.k. 10 ára fresti frá stofndegi nema sjálfsmat sé framkvæmt þess í stað. Dagsetningar sannprófana tengjast lokadagsetningum á kolefniseiningum í bið sem skráðar eru við staðfestingu verkefnisins.

Mælt er með því að sannprófunarferlinu sé ýtt af stað 12 mánuðum áður en sannprófun er áformuð. Þegar verkefniseigandi/-stjóri hefur yfirfarið nauðsynleg gögn og lagt þau fram geta liðið 6 mánuðir frá því að skrifað er undir samning við vottunarstofu þar til kolefniseiningum í bið er breytt í fullgildar kolefniseiningar á reikningi verkefnisins í Loftslagsskrá ICR.

Helstu ráð til að sannprófun gangi hnökralaust fyrir sig:

• Hafa samband við vottunarstofu með eins miklum fyrirvara og unnt er
• Ganga úr skugga um að skjöl séu fullnægjandi og nákvæm
• Ganga úr skugga um að öllum nauðsynlegum gögnum úr vettvangsúttekt hafi verið skilað (ásamt öðrum skjölum til stuðnings, hafi orðið breytingar á verkefninu)
• Bregðast fljótt við beiðnum um frekari upplýsingar, skýringar eða aðgerðir til úrbóta

Hægt er að sækja um frest á sannprófun ef gildar aðstæður koma upp – hafið samband við skrifstofu Skógarkolefnis.

Sannprófun á verkefnahópi

Verkefnahópar eru helst myndaðir áður en til sannprófunar kemur, en einnig er hægt að mynda hóp vegna sannprófunarinnar.

• Ef hópur er stofnaður vegna sannprófunar skulu allir stofndagar verkefna innan hópsins vera innan 2 ára tímabils (þetta þýðir líka að sannprófanir verkefna sem tilheyra hópnum þurfa að fara fram innan 2 ára tímabils)
• Fyrir hóp er þess krafist að skipaður sé hópstjóri og gerður hópsamningur (Sjá 2.1 Skuldbindingar landeigenda og verkefnastjóra)
• Þegar verkefni hafa myndað með sér hóp skal sami hópurinn standa að öllum sannprófunum framvegis

Hver getur sannprófað verkefni

Að undanförnu hefur ein vottunarstofa annast vottun Skógarkolefnisverkefna hérlendis. Sú stofa nefnist Enviance.